Psalms 66
Kumqondisi wokuhlabela. Ingoma. Ihubo.
1Memezani ngentokozo kuNkulunkulu mhlaba wonke! 2Hlabelani ngobukhosi bebizo lakhe; yenzani udumo lwakhe lube lenkazimulo! 3Yitshoni kuNkulunkulu lithi, “Imangalisa kangaka imisebenzi yakho! 4Umhlaba wonke uyakhothama kuwe; bahlabela udumo kuwe, bahlabelela udumo ebizweni lakho.” 5Wozani libone akwenzileyo uNkulunkulu, ukumangalisa kwemisebenzi yakhe esenzela umuntu! 6Waguqula ulwandle lwaba ngumhlabathi owomileyo, badabula phakathi kwamanzi behamba ngezinyawo – wozani sithokoze kuye. 7Uyabusa laphakade ngamandla akhe, amehlo akhe ayazikhangela izizwe – sengathi abahlamuki bangaze bamvukela. 8Dumisani uNkulunkulu wethu, lina bantu lonke, akuthi inhlokomo yokudunyiswa kwakhe izwakale; 9uzilondolozile izimpilo zethu wavikela izinyawo zethu ukuze zingatsheleli. 10Ngokuba wena, O Nkulunkulu, wasilinga; wasicenga njengesiliva. 11Wasingenisa entolongweni waseleka ngemithwalo emihlane yethu. 12Wayekela abantu bakhwela bazehlela emakhanda ethu; sedlula phakathi komlilo lamanzi, kodwa wasiletha endaweni yenala. 13Ngizakuza ethempelini lakho lomnikelo wokutshiswa ngigcwalise izifungo zami kuwe. 14Izifungo ezathenjiswa yizindebe zami lomlomo wami wazitsho lapho ngangisekuhluphekeni. 15Ngizakuhlabela izifuyo ezinonileyo, lomnikelo wezinqama; ngizanikela ngezinkunzi kanye lezimbuzi. 16Wozani lilalele, lina lonke elimesabayo uNkulunkulu; wothani ngilitshele lokho angenzele khona. 17Ngakhala kuye ngomlomo wami; indumiso yakhe yayisolimini lwami. 18Aluba ngangikade ngigogosa isono enhliziyweni yami, uJehova ngabe kazange angilalele; 19kodwa ngeqiniso uNkulunkulu walalela walizwa ilizwi lami ngikhuleka. 20Kadunyiswe uNkulunkulu ongawulahlanga umkhuleko wami futhi ongagodlanga uthando lwakhe kimi.
Copyright information for
NdeIBE